တနေ့က ဈေးသွားသည်။ ဈေးမှာ ကြက်သား
ဝယ်သည်။ ကျွန်တော် ကြက်သားဝယ်နေစဉ်
ကြက်သားဆိုင်သို့ လူငယ်တဦးလာရပ်သည်။
လူငယ်က စွပ်ကျယ်ဖြူဝတ်ထားသည်။
စွပ်ကျယ်အဖြူက အဖြူရောင်မပေါ်တော့
ပေ။ အောက်က ဘောင်ဘီတိုဝတ်ထားသည်။
ဘောင်ဘီအကွက်သည်လည်း မည်သည့်
အရောင်မှန်း မသိရပေ။ ထိုလူငယ်က ကြက်သား
ရောင်းသူ အမျိုးသမီး၏ ဘေးမှာရပ်၍ ကြက်
သားမှ စွန့်ပစ်ပစ္စည်းများကို ကြွတ်ကြွတ်အိတ်ဖြင့်
ထဲ့ယူ နေသည်။
ကြက်သားဆိုင်မှ စွန့်ပစ် ပစ္စည်းဆိုသည်က
ကြက်အတွင်းမှ ကလီစာများဖြစ်သည်ဟု
ထင်ပါသည်။ ကလီစာဟု ဆိုရာတွင် အမြစ်
အသည်းများတော့ မပါဝင်ချေ။ အများအားဖြင့်
အူများသာဖြစ် ပေမည်။ ကြက်သားရောင်းသူက
ထို အူများ မနီးမဝေးမှာ အမြစ်အသည်းများ
ကိုလည်း ပုံထားဟန်တူသည်။ ထိုလူငယ်က
စွန့်ပစ်ထားသည့် အူများကို ယူရင်း အမြစ်
အသည်းများကိုပါ လှမ်းနှိုက်ယူသလား မသိပေ။
ကြက်သားရောင်းသူ အမျိုးသမီးက
"ဟဲ့ အဲ့ဒါတွေက ရောင်းတဲ့ဟာတွေလေ၊
ဘာလို့ ယူတာလဲ"
ဟု အော်ငေါက်လေသည်။ ထိုအခါ လူငယ်က
ပြန်လှန်ပြောသည်။
"ဘယ်မှာ ယူလို့လဲ၊ မယူပါဘူး၊ မယူပဲနဲ့
မအော်ပါနဲ့"
ဟု လူငယ်က ပြန်လှန်ပြောဆိုကာ လိမ်ဖယ်
လိမ်ဖယ်ဖြင့် ထွက်သွားသည်။ ထိုလူငယ်
ထွက်သွားရာသို့ ကျွန်တော်သည် လိုက်၍
ကြည့်မိသည်။ သူသည် ဈေးအတွင်းရှိ အခြား
သား၊ ငါးဆိုင်များသို့လည်း ကြွတ်ကြွတ်အိတ်ဖြင့်
လိုက်လံတောင်းနေသည်။ သူ လိုက်လံတောင်း
သည်က သားငါးဆိုင်များကိုသာ တောင်းသည်။
အခြား ကုန်စိမ်း၊ ကုန်ခြောက်ရောင်းသူများထံ
တောင်းယူခြင်းမရှိသည်ကို တွေ့ရသည်။
ထိုအရာကို မြင်တွေ့၍ လွန်ကဲ့သော ကာလက
အဖြစ်အပျက်ကိုလည်း ပြန်သတိရမိသည်။
တရုတ်နှစ်သစ်ကူး နေ့မှာ တရုတ်ဘုံကျောင်းမှ
အဖြစ်အပျက်ဖြစ်သည်။ တရုတ်နှစ်သစ်ကူး
နေ့ဖြစ်၍ တရုတ်ဘုံကျောင်းက အင်မတန်
စည်ကားသည်။ မိန်းကလေးနှစ်ဦးသည် ဘုံကျောင်း
အတွင်း ဟိုငေး ဒီငေးကြည့်ကြသည်။
ထိုသို့ ငေးကြည့်သူ နှစ်ဦးအနက် တဦး၏
ပိုက်ဆံအိတ်ကို မိန်းမတဦးက နှိုက်ယူသည်။
ထိုအခါ အဖော်မိန်ကလေးက သတိထားမိ၍
"ဟဲ့ ဘာလို အိတ်ကို နှိုက်တာလဲ"
ဟုမေးရာ မိန်းမက ချက်ချင်း ပြန်ပြောသည်။
" မနှိုက်ပါဘူး၊ ဘယ်မှာ နှိုက်လို့လဲ"
ဟု ထိုမိန်းမကပင် ရန်ထောင်သွားသည်။
အဆိုပါအဖြစ်အပျက်များက မအူ မလည်၊
ရိုးအသူများအတွက် အငိုက်မိစေသည်။
တခါတရံ မဟုတ်မမှန်သူများက သူတို့၏
အလိမ်အညာမှုများကို ထိုသို့အငိုက် တိုက်ခိုက်
တတ်ကြပေသည်။ ထိုအရာများကို သတိထား၍
ဂရုပြုကာကွယ်ကြရပေမည်။
@htwegyi
December 24, 2024
