မင်္ဂလာပါ။ ကျွန်တော်တို့ မင်းသားကြီး Hive ကတော့ ယနေ့တွင် ပြား ၇၀ ကျော်ဈေးသို့ သက်ဆင်းသွားခဲ့ပြီ ဖြစ်ပါသည်။ Hive ဈေးကျဆင်းလာပြီဆိုတော့ Voting Value များလည်း ကျဆင်းလာတော့မည် ဖြစ်ပါသည်။
ကျွန်တော့အနေဖြင့် ၃ လကြာ Active မဖြစ်တော့သော HP Delegated အကောင့်များအား ပြန်၍ Undelegate လုပ်ရပါတော့သည်။ စုစု ပေါင်း HP 500 ကျော်ခန့် ရှိပါသည်။ အဘယ့်ကြောင့်ဤသို့ လုပ်ရသနည်းဆိုသော် Active ဖြစ်နေသော အကောင့်များအား Voting Value ပိုမိုရစေချင်၍ ဖြစ်ပါသည်။
Active မဖြစ်တော့သော အကောင့်များအားလည်း အပြစ်မဆိုသာပါ။ လျပ်စစ်မီးကမမှန် ပြင်ပ စီးပွားရေး လူမှုရေးများကလည်း တဖက်မို့ Hive Platform ပေါ်သို့ အာရုံ မရောက်နိုင်ကြခြင်း ဖြစ်တန်ရာ။ သို့သော် အခြေအနေကောင်းသော အချိန်တွင် ပြန်ရောက်လာကြပါလိမ့်မည်။
ထိုလူသစ်များအတွက် တခုသာ စိုးရိမ်မိပါသည်။ မိမိတို့ 4/5/6 လခန့်မျှ မူးစု ပဲစု စုထားသော HP များ Password key မမှတ်မိတော့၍ ဆုံးရှုံးသွားရမည့် အရေး ဖြစ်ပါသည်။ ကျွန်တော်တို့ အားလုံးနီးပါး ထိုပြသနာအား ကြုံဖူးကြပါလိမ့်မည်။ App Update လုပ်ခြင်းကြောင့် ဖုန်း computer ပြောင်း လိုက်ခြင်းကြောင့် မိမိတို့ မှတ်ထားသော Data များ ပျောက်သွားရလျင် ခေါင်းမီးတောက်ရပါပြီ။
BTC ဈေးကျခြင်းနှင့်အတူ အခြားသော Cryptocurrency များကလည်း 10% ခန့်မျှ လိုက်ပါ ကျဆင်း သွားပြီ ဖြစ်ပါသည်။ ကိစ္စမရှိပါ။ Cryptocurrency က ဈေးကျမည် ပြီးလျင် ပြန်တက်မည်။ ဈေးတက်လျင် ပျော်မည် ဈေးကျလျင် စိတ်ပျက်မည်။ သို့ပေသိ ရေးစရာရှိသည်ကတော့ ရေးနေရမည် ဖြစ်ပါသည်။
Hive ဈေး ကျသည်က တခုကောင်းပါသည်။ HBD မှ Hive သို့ ပြောင်းရာတွင် Hive ပိုရပါသည်။ သို့သော်လည်း Hive ဈေးတက်လျင်တော့ မိုတီဗိတ် ပို ဖြစ်ပါသည်။ စိတ်ကူးထားသည်များ အကောင်ထည် ပေါ်တော့မည်လား ဟူ၍။
Cryptocurrency ဟူသော အရာကလည်း အစလုပ်မိသည်နှင့် အမျှင် မပြတ်တတ်သော အရာ ဖြစ်မည်ထင်ပါသည်။ ၂၀၁၆ Steemit မှ စလိုက်သော Cryptocurrency ရောဂါသည် ယခု ထိ အရှိန်မသေ သေးပါ။
Hive Blockchain တခုတည်း ဖြင့်ပင် ဟို token ဒီ token စုလိုက် Airdrop နောက်လိုက်ဖမ်းလိုက် ယခု နောက်ပိုင်း တွင်တော့ NFT များပင် အဆစ်ပါလာပါတော့သည်။ Ragnarok ကဲ့သို့ သော Game များက လည်း NFT အိမ်မက်များ ပေးနေသည်ဆိုတော့။
ယခုတလော Coinmarketcap ဖွင့်ကြည့်ရာတွင် 24 Hrs Top Gain / lost တွင် ဒေါ်လာ ၁ ဘီလီယံ ကျော်သည့် Cryptocurrency များ မတွေ့ရသည်မှာ အတော်ကြာပြီ ဖြစ်ပါသည်။ Steem အား ဆွဲတင်သည့် ၁.၂ ဘီလီယံ နောက်ဆုံး ဖြစ်မည်ဟုထင်ပါသည်။
ကျွန်တော် မှတ်မိသလောက် ၂၀၁၆ ဝန်းကျင်တွင် ကစားခဲ့သော Cryptocurrency အတော်များများ Coinmarketcap အဆင့် ၁၀၀ မှ ပျောက်သွားကြပြီ ဖြစ်ပါသည်။ XRP / Doge / LTC / XLM / Zcash / Dash စသည် တို့ကတော့ Coinmarketcap ၏ အဆင့် ၁၀၀ တန်း ဝင်နေပါသေးသည်။
Cryptocurrency များ ဈေးကျသည် ဖြစ်စေ တက်သည် ဖြစ်စေ သေချာသည်တခုကတော့ နေ့စဉ် နေ့တိုင်း အိပ်ယာထပြီးသည်နှင့် ယနေ့ Hive ဘယ်ဈေး ဖြစ်နေပြီလဲ ဟူ၍ အလျင် ဝင်ကြည့် ဖြစ်ခြင်း ဖြစ်ပါသည်။ Hive Platform ကတော့ ကျွန်တော့ နေ့စဉ်ဘဝ၏ တစိတ်တပိုင်းအား လွှမ်းမိုးထားပြီ ဖြစ်ပါသည်။
Henry Aung ( Kachin )
06/05/2022 - Friday - 17;37 Pm
